13 iyun 2020-ci il tarixində «Azerbaijani Union» platformasının və «Tech Academy» təhsil mərkəzinin təşəbbüsü ilə Amerika Birləşmiş Ştatları və Kanadada yaşayan azərbaycanlı xanımların texnologiya sahələrinə cəlb edilməsi üzrə təlim silsiləsinin ikinci hissəsinə start verilib.
Layihə çərçivəsində növbəti təlimdə aztəminatlı ailələrdən, işsiz və ya tələbə olan azərbaycanlı xanımlara peşəkar təlimçilər tərəfindən dövrün ən tələbatlı peşələrindən olan Manual QA Testing üzrə ödənişsiz əsaslarla hazırlıq həyata keçiriləcək.
Tədris proqramı həftəsonları onlayn şəkildə həyata keçirilməklə 3 ay davam edəcək. Amerika Birləşmiş Ştatları və Kanadadan ümumilikdə 12 xanım Manual QA Testing dərslərinə qoşulub. Bu kurs hesabına İnformasiya Texnologiyaları sahəsində heç bir bilik və təcrübəsi olmayan iştirakçılar texniki peşəyə sahib olacaqlar.
Proqramın yekununda Amerika Birləşmiş Ştatlarında mövcud sahə üzrə çalışan azərbaycanlı mütəxəssislər təlim iştirakçılarına işədüzəlmə üzrə hazırlıq keçəcəklər. Eyni zamanda təhsil almış xanımlara fəaliyyətdə olan şirkətlərdə praktika keçmək imkanı yaradılacaq.
«Tech Academy» Python proqramlaşdırma dilini Azərbaycanda bootcamp formatında tədris edən yeganə təhsil mərkəzidir. Layihə «Tech Diaspora» və «Şimali Kaliforniya Azərbaycan Mədəniyyət Mərkəzinin» dəstəyi ilə həyata keçirilir.
